Այսուհետ ԱԱԾ մարմինների նեղ մասնագիտական կրթություն պահանջող առանձին պաշտոններ կհամալրվեն զինվորական ծառայությունից ազատված և հետագայում պահեստազորում գրանցված անձանցով

ՀՀ Նախագահը հունիսի 15-ին ստորագրեց Ազգային ժողովի կողմից հունիսի 13-ին ընդունած «Ազգային անվտանգության մարմիններում ծառայության մասին» Հայաստանի Հանրապետության օրենքում փոփոխություններ և լրացումներ կատարելու մասին ՀՀ օրենքը: Այդ մասին տեղեկացնում է Նախագահի լրատվական ծառայությունը:

Համաձայն հաստատված փոփոխությունների, ԱԱԾ մարմինների նեղ մասնագիտական կրթություն պահանջող առանձին պաշտոններ կհամալրվեն զինվորական ծառայությունից ազատված և հետագայում պահեստազորում գրանցված անձանցով: Գործող օրենքով, ԱԱԾ աշխատակիցների համար պարտադիր պայման էր զինվորական ծառայություն անցած լինելը:

ԼՂՀ տարածքում ՀՀ-ՌԴ ՀՕՊ համաձայնագիրը չի գործում...

«Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագրի վերաբերյալ ՀՀ պաշտպանության նախարարությունը հրապարակել է տեղեկանք։ Ըստ, որի. ««Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» Համաձայնագիրը ստորագրվել է 2015թ. դեկտեմբերի 23-ին:

Համաձայնագրի 2-րդ հոդվածի 1-ին մասով նախատեսվում է, որ Հավաքական անվտանգության կովկասյան տարածաշրջանում հակաօդային պաշտպանության կատարելագործման նպատա­կով ստեղծվում է հակաօդային պաշտպանության միավորված (անհրաժեշտ է նկատել, որ սա համատեղ, այլ ոչ թե միասնական համակարգ է, այսինքն` ՀՀ ԶՈՒ հակաօդային պաշտպանության զորքերը պահպանում են իրենց ինքնուրույնությունը) տարածաշրջանային համակարգ:

Մանրամասն...

Մեկնեցին Գերմանիա՝ վերապատրաստման

ՀՀ ՊՆ հաղորդմամբ, հունիսի 12-ին Աֆղանստանում միջազգային անվտանգության աջակցության ուժերի կազմում ՆԱՏՕ-ի առաքելությանը մասնակցելու նպատակով հայ խաղաղապահների 56 հոգուց բաղկացած ստորաբաժանումը մեկնեց Գերմանիա: 

Մինչ Աֆղանստանում տեղակայվելը` հայ խաղաղապահների զորախումբը Գերմանիայում կմասնակցի մեկամսյա վերապատրաստման դասընթացներին և նախատեղակայման վարժանքներին:

Ինչպես տեղեկացնում է ՌԱԶՄ.info, պարապմունքները կրում են պարբերական բնույթ: Աֆղանստան մեկնող հայ խաղաղապահների յուրաքանչյուր խումբ նախապես վերապատրաստվում, մարզումներ է անցնում Գերմանիայում: ՀՀ ԶՈւ խաղաղապահների նախորդ խումբն այդ նպատակով Գերմանիա է մեկնել նաև փետրվարին:

Հավելենք, որ Աֆղանստանում իրականացվող խաղաղապահ առաքելություններին Հայաստանը մասնակցում է 2010 թվականից: Աֆղանստանում հերթափոխով ծառայություն է անցկացնում Հայաստանի զինված ուժերի 131 խաղաղապահ զինծառայող, որոնք խաղաղապահ առաքելությանը մասնակցում են Գերմանիայի զինված ուժերի հրամանատարության ներքո՝ Աֆղանաստանի հյուսիսային հրամանատարության կազմում:

Ընդհանուր առմամբ, Հայաստանը միջազգային խաղաղապահ առաքելություններին միացել է 2001-ին, իսկ անմիջական մասնակցություն ունի 2004 թվականից: Առ այսօր հայ խաղաղապահները մասնակցել են չորս առաքելությունների` 2004թ-ից Կոսովոյում, 2005թ-ից՝ Իրաքում, 2010թ-ից՝ Աֆղանստանում, 2014-ից՝ Լիբանանում։ 2015թ-ից ՀՀ ՊՆ խաղաղապահ բրիգադի մեկ սպա որպես դիտորդ մասնակցում է Մալիում ՄԱԿ հովանու ներքո անցկացվող խաղաղապահ առաքելությանը:

Աղբյուրը՝ http://razm.info/

ԻՏՁՄ-ի նախաձեռնած ռազմարդյունաբերությանն աջակցող մոբիլիզացիոն ծրագրին միացել են շուրջ 300 մասնագետ

Կայացել է Ինֆորմացիոն տեխնոլոգիաների ձեռնարկությունների միության (ԻՏՁՄ) նախաձեռնած ՏՀՏ (Տեղեկատվական և հաղորդակցման տեխնոլոգիաների) և ԲՏ (Բարձր տեխնոլոգիաների) ոլորտի մոբիլիզացիոն ծրագրին աջակցել ցանկացողների առաջին հանդիպումը: Ըստ աղբյուրի, այս նախաձեռնության նպատակն է համախմբել գիտական ներուժը, մարդկային ռեսուրսները և միավորել առկա ռազմարդյունաբերական համակարգին:

Ստեղծվել են աշխատանքային խմբեր, որտեղ ընդգրված են մի շարք կամավոր ծրագրավորողներ, ինժեներներ, ֆիզիկոսներ, քիմիկոսներ, բժիշկներ և այլ մասնագետներ, որոնց թիվը հասնում է 300-ի: Հանդիպման ընթացքում ներկայացվել է միության կողմից արդեն իսկ կատարված աշխատանքները, կազմվել է միջոցառումների ծրագրեր՝ կամավորների կողմից իրականացվող աշխատանքների հետագա կարգավորման նպատակով:

Նշենք, որ ՏՀՏ և ԲՏ ոլորտի մոբիլիզացիոն ծրագիրն իրականացվում է պաշտպանության նախարարի հրամանով, համաձայն որի համապատասխան աշխատանքներ են տարվում  զինատեսակների արդիականացման ուղղությամբ: Հարկ է նշել, որ դեռևս ապրիլ ամսին ԻՏՁՄ հայտարարել էր ՏՀՏ ոլորտի մոբիլիզացիոն ծրագրի մեկնարկի մասին, որի շրջանակում հավաքագրվում է  կամավորների և տեխնիկական ռեսուրսների վերաբերյալ համապատասխան տեղեկատվություն: