Անվճար և արտոնյալ պայմաններով բժշկական օգնություն ...

Հարց. Ովքե՞ր կարող են ստանալ անվճար և արտոնյալ պայմաններով բժշկական օգնություն. 

Պատասխան. Պետության կողմից երաշխավորված անվճար բժշկական օգնության և սպասարկման մասին ՀՀ կառավարության N 318-Ն որոշումը սահմանում է, որ անվճար կարող են բուժվել հետևյալ խմբի մարդիկ՝ 

Աղքատության (ընտանեկան) նպաստի համակարգում ընդգրկված 38,00 և ավելի բարձր անապահովության միավոր ունեցող նպաստառուներ 1-ին խմբի հաշմանդամներ, 2-րդ խմբի հաշմանդամներ, 3-րդ խմբի հաշմանդամներ: 

Հաշմանդամ երեխաներ (մինչև 18 տարեկան): 

Հայրենական մեծ պատերազմի մասնակիցներ և նրանց հավասարեցված անձինք:

Միածնող երեխաներ (մինչև 18 տարեկան):

Առանց ծնողական խնամքի մնացած երեխաներ (մինչև 18 տարեկան) և առանց ծնողական խնամքի մնացած երեխաների թվին պատկանող անձինք (18-23 տարեկան):

Բազմազավակ (մինչև 18 տարեկան 4 և ավելի անչափահաս երեխաներ ունեցող) ընտանիքների երեխաներ:

Հայաստանի Հանրապետության պաշտպանության ժամանակ, ինչպես նաև ծառայողական պարտականությունները կատարելիս զոհված (մահացած) զինծառայողների ընտանիքների անդամներ, Չեռնոբիլի վթարի վերացման աշխատանքների մասնակիցներ:

Բռնադատվածներ բժշկասոցիալական փորձաքննության իրավասու պետական մարմնի ուղեգրով լրացուցիչ բժշկական հետազոտության ենթարկվողներ: Հաշմանդամներից բաղկացած ընտանիքների երեխաներ (մինչև 18 տարեկան) մինչև 7 տարեկան երեխաներ:

Նախազորակոչային և զորակոչային տարիքի անձինք (հիվանդանոցային և ամբուլատոր-պոլիկլինիկական բժշկական օգնություն, իսկ զորակոչային տարիքի անձանց` նաև հիվանդանոցային փորձաքննություն):

Զինծառայողներ և նրանց ընտանիքների անդամներ:

Ձերբակալվածներ և ազատազրկման դատապարտվածներ: 

Մանկատներում և ծերանոցներում խնամվողներ:

Մինչև 18 տարեկան` դիսպանսեր հսկողության տակ գտնվող երեխաներ: 

Հավելենք նաև, որ ըստ Առողջապահության նախարարության պարզաբանումների՝  

«Շտապօգնության» ծառայության միջոցով բժշկական կենտրոն տեղափոխվող հիվանդի բուժօգնությունն իրականացվում է անվճար հետևյալ դեպքերում.

«Շտապօգնության» ծառայության միջոցով հիվանդների հոսպիտալացումն իրականացնում է կյանքին վտանգ սպառնացող և անհետաձգելի հիվանդանոցային բուժօգնություն պահանջող դեպքերում՝ անկախ ախտորոշումից, քաղաքացիությունից և սոցիալական կարգավիճակից: Շտապ բժշկական օգնության կայանի (բաժանմունքի) բրիգադների կողմից հիվանդանոցային բժշկական կազմակերպություն տեղափոխված հիվանդները ենթակա են անհապաղ բժշկական քննության և, անհրաժեշտության դեպքում, պարտադիր հոսպիտալացման՝ անկախ տվյալ հիվանդանոցային բժշկական կազմակերպությունում ազատ տեղերի առկայությունից:

Վերակենդանացման միջոցառումներ և ինտենսիվ թերապիա պահանջող հիվանդությունների և վիճակների դեպքում հիվանդների բուժօգնությունն իրականացվում է անվճար՝ համաձայն ՀՀ առողջապահության նախարարի 2013թ. հոկտեմբերի 18-ի N65-Ն հրամանի 1 և 2 հավելվածներով սահմանված ցանկերի: Այս ցանկերից դուրս բնակչության պետության կողմից երաշխավորված անվճար բժշկական օգնությունը և սպասարկումն իրականացվում է համավճարային սկզբմունքով՝ համաձայն ՀՀ առողջապահության նախարարի 2013 թվականի փետրվարի 7-ի թիվ 229-Ա հրամանով հաստատված հավելվածի:

Նշենք, որ «Շտապ բժշկական օգնության» միջոցով հիվանդի բժշկական կենտրոն տեղափոխումն անվճար բուժօգնության հիմք չէ:

• < Prev
• Next >