ԲԱՑ ՆԱՄԱԿ
ՀՀ Նախագահ, պարոն Արմեն Սարգսյանին
ՀՀ Վարչապետ, պարոն Նիկոլ Փաշինյանին
Հայաստանի Հանրապետության մեծարգո պարոնայք
Հպարտությամբ տոնում էինք Շուշիի ազատագրման օրը, բայց նրանք, ովքեր մասնակցել էին Շուշիի գրավմանը կամ տեղյակ էին, թե ինչպես հաջողվեց այն ազատագրել, լավ գիտեն, չնայած որ մեծ էր Արկադի Տեր-Թադևոսյանի դերը հաղթանակին հասնելու համար, բայց ոչ պակաս դեր ուներ և Սամվել Բաբայանը, որին անհասկանալիորեն ոչ մեկը չհիշատակեց, և ինչ սրտով էին խոսում Շուշիի ազատագրման մասին, երբ այդ մարտի հերոս հրամանատարը քաղաքական դրդապատճառներով գտնվում էր ազատազրկման մեջ:
Մայիսի 8-ին տեղի ունեցավ Վարչապետի ընտրություն, ընտրվեց ժողովրդի ընտրյալ Վարչապետը, այսինքն՝ տեղի ունեցավ իրավիճակի փոփոխություն, որի արդյունքում Հայաստանի Հանրապետության Նախագահը կարող էր և մարդասիրությունից ելնելով, պարտավոր էր ներում շնորհել Շուշիի ազատագրման հերոս հրամանատար Սամվել Բաբայանին, այն դեպքում, երբ վերջինիս դատել են քաղաքական դրդապատճառներով: Մենք՝ որպես իրավաբաններ, հայտարարում ենք, որ նրա արարքը հանցակազմ չի պարունակում, Սամվել Բաբայանը պետք է ազատվի, և նրան անհիմն մեղադրողները պետք է պատժվեն:
«Արժանապատիվ Սպա» իրավա-սոցիալական հասարակական կազմակերպությունը մեկ անգամ ևս խնդրում և կոչ է անում Ձեզ՝ Հայաստանի Հանրապետության Նախագահ, պարոն Սարգսյան, ներում շնորհել Սամվել Բաբայանին և մյուս քաղբանտարկյալներին, իսկ Ձեզ՝ հանրապետության ժողովրդի նորընտիր Վարչապետ, պարոն Փաշինյան, խնդրում ենք մասնագիտական ուսումնասիրության ենթարկել Ս. Բաբայանի վերաբերյալ քրեական գործը՝ մեկ անգամ ևս համոզվելու համար, որ վերջինիս դատել են քաղաքական դրդապատճառներով և անհապաղ ազատ արձակել, քանի որ ներկա փուլում մեր երկիրը և, հատկապես, բանակը խիստ կարիք ունի Սամվելի ու նրա նման հերոսների:
Հարգանքով՝
«Արժանապատիվ Սպա» ԻՍՀԿ նախագահ,
գեներալ - լեյտենանտ Գագիկ Կոստանդյան